Rugi (Opini Singkat)

Prei pungkasaning semester 4 kalawingi kula sakanca menyang Pantai Pok Tunggal. Papanipun pancen tebih, wonten ing Kecamatan Tepus, Gunung Kidul. Margi dhateng pantai menika kathah-kathahipun pategalan para warga saha ngliwati alas Wanagama. Kula sakanca nyarter mobil, amargi tiyang kathah ingkang tumut. Sasampunipun nglampahi perjalanan kirang langkung 2 jam, pungkasanipun kula sakanca dumugi Pantai Pok Tunggal.

Pok Tunggal ingkang nengsemaken manah

Pantai kasebat kalebet objek wisata enggal ing Kabupaten Gunung Kidul. Margi kangge mlebet ing papan menika taksih arupi sela-sela ingkang dipuntata. Manawi jawah mesthi kemawon sitinipun jeblog amargi dereng dipunaspal. Kawontenan menika miris sanget, amargi Pok Tunggal menika kalebet salah satunggaling papan ingkang sae lan nengsemaken manah. Pasiripun warni pethak, ombakipun boten patos ageng, gisikipun ugi taksih resik, amargi dereng kathah ingkang tindak ing pantai menika. Manawi Pemerintah Kabupaten Gunung Kidul menika langkung nggatosaken kawontenan menika, marginipun dipundandani saha srana dipundamel langkung sae saged ndadosaken Pantai Pok Tunggal menika langkung rame lan narik kawigatosanipun para wisatawan.

Pantai Pok Tunggal menika kalebet pantai ingkang unik, amargi wontenipun tanduran langka arupi wit duras ingkang cacahipun pok namung setunggal. Nama kasebat lajeng dipundadosaken namaning papan inggih menika Pok Tunggal. Wonten ngriku ugi kathah gasibu-gasibu ingkang mapan ing inggiling tebing kapur, payung maneka warna ing kasewakaken kanthi regi ingkang mirah. Terumbu karang lan manekawarna kewan-kewan laut ugi saged dipunpirsani kanthi cetha. Warung-warung alit ingkang nyedhiyani dhedhaharan saha unjukan ugi kathah, wonten ugi ingkang nyamektakaken mushola saha toilet.

Sadumuginipun ing gisik, kanca-kanca kula sami ambyur ing segara. Ananging kula kaliyan kanca kula sanesipun nanging wonten pinggiring gisik, boten tumut ambyur ing toya. Kula boten ambyur amargi boten mbekta salin saha ajrih manawi kulitipun dados radi cemeng. Kanca-kanca kula ingkang ambyur lajeng moyoki kula lan sakanca ingkang boten ambyur. Miterat kanca-kanca kula manawi dhateng pantai lan boten ambyur menika ndadosaken rugi. Kula lajeng dipunciprati toya supados tumut ambyur, ananging kula boten purun.